އިންޑިއާ ސިފައިންގެ ބަދަލުގައި އިންޑިއާގެ އާއްމު މީހުން ބޭއްތިއްބުމާއި ގުޅޭ ސުވާލަށް ރައީސް ޖަވާބެއް ނުދެއްވި!

ރައީސްގެ ޖަވާބުގެ ނަމުގައި، ރައީސުލްޖުމްހޫރިއްޔާގެ އޮފީހުން، ސޯޝަލްމީޑިއާގައި ގެނެސްދޭ ސިލްސިލާގައި، މިއަދު ޕޯސްޓްކުރި ވީޑިއޯގައި އާއްމު މީހަކު ސުވާލުކޮށްފައި ވަނީ، އިންޑިއާ ސިފައިންގެ ބަދަލުގައި އިންޑިއާގެ އާއްމުން އިންޑިއާ ސިފައިން ތިބި މަރުކަޒުތަކަށް ގެންނަން އުޅޭ ކަމަށް ދެކެވޭ ވާހަކަތަކާއިގުޅޭ ގޮތުންނެވެ. މިގޮތުން ހުޅުމާލެ، ފުލެޓް ނަންބަރު 21308، އަޙްމަދު ޝަރީފް ހުށައެޅުވި ކަމަށް ރައީސުލްޖުމްހޫރިއްޔާގެ އޮފީހުން އާއްމުކުރި ވީޑިއޯގައި ކުރައްވާފައިވާ ސުވާލަކީ، އިންޑިއާ ސިފައިން ޔުނީފޯމް ބާލާފައި ކުލަ ހެދުމުގައި ރާއްޖެ އަންނަން އުޅޭ ވާހަކަ އަޑު އިވޭކަމަށާއި އެކަން ސާފުވާން އެދޭ ކަމަށެވެ.